Álfheiður Erla Guðmundsdóttir, sópran

Sópransöngkonan Álfheiður Erla Guðmundsdóttir er fædd og uppalin í Reykjavík. Álfheiður fæddist inn í mikla tónlistarfjölskyldu og hefur verið umvafin söng allt sitt líf. Hún stundaði söngnám í Suzukitónlistarskóla Reykjavíkur frá unga aldri og söng í stúlkna- og kammerkór Bústaðakirkju. Síðar söng hún með Kór Menntaskólans við Hamrahlíð og Hamrahlíðarkórnum.

Hún lauk framhaldsprófi frá Söngskóla Sigurðar Demetz vorið 2013. Hennar helstu kennarar við skólann voru Hallveig Rúnarsdóttir og Sigrún Hjálmtýsdóttir. Vorið 2014 hóf hún bakkalárnám við Hanns Eisler tónlistarháskólann í Berlín hjá Prof. Anna Korondi, Liana Vlad og Hendrik Heilmann. Hún stundar nú mastersnám við sama skóla eftir að hafa lokið bakkalárprófi þaðan vorið 2018, með hæstu einkunn. Á meðal annarra kennara hennar við skólann eru Wolfram Rieger og Peter Berne.

Á síðastliðnum fjórum árum hefur Álfheiður tvívegis komið fram á „Exzellenz-Konzert“ sem eru haldnir fyrir framúrskarandi nemendur skólans og unnið til verðlauna í alþjóðlegu Giulio-Perotti söngkepninni. Auk þess hefur Álfheiður farið með hlutverk Súsönnu í „Le nozze di Figaro“ í Uferstudios Berlin, Marzellinu í „Fidelio“ í Liszt Akademíunni í Búdapest,  Poppeu  í „Agrippina“ í Radialsystem Berlin, Flaminiu í „Il mondo della luna“ við HfM Berlin, svo fátt eitt sé nefnt. Hún hefur tekið þátt í meistaranámskeiðum meðal annars hjá Emma Kirkby, Laura Sarti og Janet Williams.

Álfheiður var valin til þess að taka þátt í Britten-Pears Young Artist Programme sumarið 2018 þar sem hún vann með heimsþekktu tónlistarfólki, m. a. söngkonunni Anne Sofie von Otter. Álfheiður hefur verið styrkþegi Deutschlandstipendium og Live Music Now „Yehudi Menuhin“ sjóðsins frá árinu 2016.

Álfheiður mun fara með hlutverk Mjallhvítar (Wolfgang Mitterer/Engelbert Humperdinck) í Staatsoper Berlin vorið 2019.